ISiwelele izodlala nePirates seyihlome ngabadlali ebaboleke kwiChiefs
SIHLE NGUBO
Abadlali ababili beKaizer Chiefs, abangajwayele ukudlala, babolekiswe eqenjini Elisha kwiBetway Premiership, iSiwelele FC, kuze kuphele isizini ka-2025/2026.
Lokhu kuqinisekiswe yilona leli qembu laseNaturena, ukuthi uHappy Mashiane noSamkelo Zwane bazoba kwiSiwelele ngokwesivumelwano sokubolekiswa.
Leli qembu elibunjwe ekuqaleni kwesizini, kulandela ukuthenga isitifiketi sokudlala seSuperSport United, liyabadinga impela abadlali kulandela ukungayiqali kahle isizini.
ISiwelele izobhekana ne-Orlando Pirates emdlalweni weBetway Premiership, eToyota Stadium, eBloemfontein, ngoLwesibili ngo-7.30 ebusuku.
Leli qembu lingase liye kulo mdlalo selihlome ngoMashiane noZwane uma kungukuthi bazobe sebekulungele ukudlala.
EZimnyama zishaye iLioli yaseLesotho ngo 3-0 emdlalweni weCAF Champions League enkundleni efanayo ngempelasonto.
Ngaphambi kwalokhu iPirates ishaye iStellenbosch FC ngo 3-0 kowamanqamu weMTN8, kanti nasemdlalweni wePremiership egcine iwudlale neChippa United inqobe ngo 3-0.
Ngakolunye uhlangothi iSiwelele igcine ishaywe yiMagesi FC ngo 2-0 emdlalweni weBetway Premiership ngoMgqibelo.
Emidlalweni eyisikhombisa yeligi leli qembu lisanqobe waba munye, lase lidlala ngokulingana owodwa.
Lokhu kulenza libalwe namaqembu ahlezi ezembeni ngasemsileni welogi yePremiership.
