IPirates kumele iphendule amatafula kwesikaMaminzela emdlalweni weCAF
SIHLE NGUBO
I-Orlando Pirates kuzodingeka yenze eyakwenza kwiLioli yaseLesotho, uma seyihlangana neSt Lupopo yaseDemocratic Republic of Congo (DRC) emdlalweni womlenze wesibili weCAF Champions League, e-Orlando Stadium, ngoMgqibelo ngo-3 ntambama.
IBucs iya kulo mdlalo, womzuliswano wesibili weChampions League, ilandela ngemuva ngo 3-0 kulandela isibhaxu esithole eLumumbashi, eDRC, ngempelasonto edlule.
Yize kubukeka kuzoba ngumqansa kuleli qembu laseSoweto kodwa abalandeli balo bazokwethemba ukuthi lizoshaya amagoli amane eSigodini sikaMaminzela, njengoba lenzile emlenzeni wesibili libhuquzisa iLioli yaseLesotho.
EZimnyama zingathembela ekutheni irekhodi leLupopo alilihle neze uma idlala ekuhambeni emidlalweni yeCAF.
Nokho leli qembu laseDRC lizame laphumelela ukudlula kwi-Al Merreikh yaseSudan, emzuliswaneni wokuqala.
Ekuhambeni iLupopo ibambe i-Al Merreikh ngo 0-0, kwathi ekhaya yanqoba ngo 1-0, okwenze yadlulela emzuliswaneni wesibili.
Ngaphambi kokubuyela kwiChampions League leli qembu laseDRC lidlale kwiConfederation Cup, kathathu amasizini elandelana.
Kule midlalo lishaywe kane lase lidlala ngokulingana kabili emidlalweni yasekuhambeni.
Lapha kubalwa nemidlalo eliyidlale eNingizimu Afrika, elishaywe kuyona yiMarumo Gallants emidlalweni yamaqoqo ngeConfed Cup ka-2022/2023, laphinde lashaywa yiSekhukhune United ngo 3-1 emzuliswaneni wokuqala ngesizini elandele leyo.
Konke lokhu kuchaza ukuthi uzodla ngokushuba kakhulu umdlalo womlenze wesibili ngoMgqibelo, ngoba alikho iqembu elizozithela ngabandayo.
Irekhodi lePirates lakamuva likhomba ukuthi ingawaphendula amatafula e-Orlando Stadium, idlulele esigabeni samaqoqo.
IBucs seyinqobe imidlalo eyisikhombisa ilandelana kuyo yonke imiqhudelwano. Phakathi nesonto ishaye iPolokwane City ngo 1-0 emdlalweni weBetway Premiership.
Kulo mdlalo kukhona abadlali ebibaphumuzile abafana noDeon Hotto benoTshegofatso Mabasa, okulindeleke badlale ngoMgqibelo.
IPirates akumele idedele igoli kuqala kulo mdlalo, njengoba yenzile emlenzeni wokuqala, ngoba lokho kuzokwenza izinto zibe nzima kakhulu.
