Abalandeli beDowns bacisho bajuqa isikhulu seqembu labo eLoftus Stadium
SIHLE NGUBO
Abalandeli beMamelodi Sundowns, abebethukuthele begane unwabu, bahlasele uFlemming Berg, oyiSporting Director yeqembu, ngemuva komdlalo weCAF Champions League, eLoftus Stadium, ePitoli, ngoLwesihlanu ebusuku.
Abafana Ba’Style babambane ngo 2-2 ne-Al Hilal SC yaseSudan, kulo mdlalo wesithathu wamaqoqo kwiChampions League.
Yize inganqobanga kulo mdlalo iSundowns kodwa iyona esazihola phambili ngamaphuzu amahlanu kuGroup C.
Bekuvele kuyiwe kulo mdlalo abalandeli beSundowns bengeneme ngezinto eziqhubeka kuleli qembu laseChloorkop, abakholwa ukuthi alidlali ibhola ebelilidlala kumasizini edlule.
Emasontweni edlule kuke kwavela imibiko yokuthi uzokhonjwa indlela umqeqeshi uMiguel Cardoso, kubuyiswe uPitso Mosimane oke wayicija ngempumelelo iSundowns phambilini.
Nokho lokhu akubukeki kuzokwenzeka njengoba kunecala elithinta uMosimane neSundowns, eliqhubekayo enkantolo.
Leli cala limlahlile uMosimane nyakenye kwathiwa akakhokhele iSundowns imali elinganiselwa ku-R8 million, nenzalo yakhona.
Lo mqeqeshi akayingeni leyo njengoba elidlulisele phambili icala ngesonto eledlule.
Emaphepheni asenkantolo kuze kwavela ukuthi uMosimane uthi esinye isizathu ezenza washiya iSundowns, ukuthi kukhona ababemsongela ngokumbulala, nokuyinto amazisa yona uPatrice Motsepe owayengusihlalo weqembu ngaleso sikhathi.
Abalandeli beSundowns bahlasela uBerg nje yingoba bakholwa ukuthi uyena ovimbe ukuthi kuxoshwe uCardoso, abangasamfuni eqenjini.
Inkontileka kaCardoso neSundowns iphela ngoJuni ka-2027, nokuchaza ukuthi kungamele bayinqamule uma bemxosha.
UBerg noCardoso baphume ngesamagundwane eLoftus Stadium, umqeqeshi wangathola machaphazelo kodwa iSporting Director yaba mayoywana ukuthelwa ngamanzi.
Amehlo azothi njo kuThlopi Motsepe, ongusihlalo weqembu, ukuthi alungise lesi simo esibukeka siphuma esandleni eChloorkop.
ISundowns izihola phambili kwilogi yeBetway Premiership ngaphambi komdlalo weSekhukhune United ne-Orlando Pirates, ongashintsha izinto ngoMgqibelo ntambama.
