IDurban City ibukeka ingafuni ukwehlulwa yiChippa ngokuxosha abaqeqeshi
SIHLE NGUBO
IDurban City ibukeka isithathe isitayela esingesihle seChippa United, sokupheka ithulule abaqeqeshi esikhathini esifushane.
Lokhu kulandela izindaba zokuthi leli qembu selihlukene nomqeqeshi, uSinethemba Badela, obekungakapheli nesikhathi esingakanani efikile eqenjini.
UBadela ubesahlale ebhentshini laleli qembu laseThekwini imidlalo emithathu kuphela, kumbandakanya nowangoLwesihlanu weNedbank Cup Last 32.
Leli qembu linqobe ngo 3-2 sekukhahlelwa amaphenathi kulo mdlalo lishaya iChippa United, nayo ake athi qu kuyona uBadela ekuqaleni kwesizini.
Akukacaci ukuthi yini eqhathe uBadela nabaphathi beCity kodwa kulindeleke ukuthi iqembu likhiphe isitatimende maduze nje.
NgoDisemba iCity ihlukane noGavin Hunt, obecija iqembu elikhulu, yaphinde yakhomba indlela uDaine Klate obecija iqembu elidlala kwiDStv Diski Challenge (DDC).
UKlate, owake wayibamba kwiSuperSport United ne-Orlando Pirates, uqashwe yileli qembu laseThekwini ngoJulayi ukuthi azohola iqembu leDCC.
Kukholakala ukuthi uHunt, okwaziwayo ukuthi uxhumene noKlate ayemqeqesha kwiSuperSport neBidvest Wits, uyena owayenxenxe iCity ukuthi imqashe kwiDDC.
Kusobala ukuthi ukuhamba kukaHunt yikona okwenze abaphathi beCity bathatha isinqumo sokuthi inqola ayihambe noseyili.
Ekuqaleni kwesizini iCity imangaze abaningi ichitha uSimo Dladla, okunguyena oyinyusele kwiBetway Premiership.
Leli qembu lidle umhlanganiso kwiMotsepe Foundation Championship, ngaphansi kukaDladla elingabange lisamgcina.
Esitatimendeni liveze ukuthi alizange livumelane noDladla ngezinto ezithile, okusolakala ukuthi yimali.
Nakanjani bekumele ihluke imali ebizoholwa yilo mqeqeshi njengoba iqembu selidlala esigabeni esiphezulu, esikhokhela kangcono.
U-Ernst Middendorp uke wahamba kwiCity abeqashwe kuyona njenge-technical director kusekhona uHunt, kodwa usebuyile kuleli qembu.
Ngeke kumangaze nakancane uma lo mqeqeshi waseGermany enganikwa isikhundla sokucija iCity, ngoba uyatholana nosihlalo weqembu uFarook Kadodia.
IChippa United yilona iqembu lePremiership elaziwayo ukuthi lixosha okungasenani abaqeqeshi abane ngesizini eyodwa.
UBadela kuqale isizini eqeqesha yona iChilli Boys, yamchitha kwafika uLuc Eymael naye engasekho, njengoba sekukhona uVusumuzi “Kanu” Vilakazi.
