UBroos uchaza ngokushiya unozinti wePirates esikwatini seBafana
SIHLE NGUBO
Kusale ngaphandle abadlali be-Orlando Pirates, okukhona kubona nonozinti uSipho Chaine, ngesikhathi umqeqeshi weBafana Bafana uHugo Broos ememezela iqembu lakhe ngoLwesine.
IBafana ilungiselela ukubhekana nePanama emidlalweni emibili yobungani eMoses Mabhida Stadium, eThekwini, naseCape Town Stadium, eKapa, ngoMashi 27 no-31.
Ngokujwayelekile uChaine uhlale ekhona eqenjini likaBroos kodwa kulokhu indawo yakhe ithathwe uRenaldo Learner weSekhukhune United.
Abanye abadlali bePirates abasale ngaphandle uPatrick Maswanganyi, uYanela Mbuthuma noKamogelo Sebelebele, abebekhona esikwatini esikhulu esikhishwe emasontweni edlule.
Okuphawulekayo ukuba khona kuka-Ime Okon, odlala kwiHannover 96, eGermany, noBongokuhle Hlongwane, ogijima kwiMinnesota United, e-USA.
U-Iqraam Rayners, ongumgadli weMamelodi Sundowns oshisayo kule sizini, uphinde wasala ngaphandle naye.
URayners ubengekho nakwi-Africa Cup of Nations (AFCON) kanti yinto eyaziwayo ukuthi uBroos uyazifela ngo-Evidence Makgopa wePirates, okhona kuleli qembu.
Ephawula ngokushiya kwakhe uChaine, uBroos uthe: “Wonke umuntu kumele akhathazeke, angisho ukuthi akadlali kahle.
“Kodwa lena akuyona indawo yokudlala, ngifuna ukubona uRenaldo Leaner. Akukho mayelana nasenkundleni kodwa nangaphandle kwayo.”
Selilonke iqembu limi kanje:
Onozinti: Ronwen Williams, Ricardo Goss, Renaldo Learner
Izitobha: Mbekezeli Mbokazi, Nkosinathi Sibusi, Ime Okon, Khuluso Mudau, Khulumani Ndamane, Aubrey Modiba, Thabang Matuludi, Samukele Kabini
Abasesiswini: Tebogo Mokoena, Thalente Mbatha, Siphephelo Sithole, Jayden Adams
Amafolosi: Tshepang Moremi, Evidence Makgopa, Themba Zwane, Lyle Foster, Relebohile Mofokeng, Oswin Appollis, Bongokuhle Hlongwane, Thapelo Maseko
