Abayi ndawo ‘otolika’ abachithwe yiChiefs
SIHLE NGUBO
Abaqeqeshi ababili abachithwe yiKaizer Chiefs, uCedric Kaze noYoussef Ben Khalil, abayi ndawo, basazobonakala kwiBetway Premiership ngesizini ezayo.
Laba baqeqeshi, abebebizwa abalandeli baseNingizimu Afrika ngotolika, benze kahle kwiChiefs ngesizini edlule, ngemuva kokuthatha izintambo kulandela ukuhamba kukaNasreddine Nabi, abebengamaphini akhe.
Ngaphansi kwalaba baqeqeshi, iChiefs iqede isizini inamaphuzu angu-54, okungawesithathu ngobuningi eminyakeni engu-11 eyedlule.
Bagejeke kancane ukuthi bangene kweyomkhumulajezi yeCAF Confederation Cup, njengoba beshaywe umehluko wamagoli yize beqede benamaphuzu ayishumi.
Ngesizini ka-2025/2026, bahole iChiefs emidlalweni engu-39 kwiBetway Premiership, iCAF Confederation Cup, iCarling Knockout Cup, neNedbank Cup.
IChiefs inqobe imidlalo engu-19, yadlala ngokulingana engu-11 yase ishaywa eyisishiyagalolunye.
Nokho ekupheleni kwesizini Amakhosi amemezele ukuthi asehlukene noKaze benoBen Khalil, bababonga ngabakwenzele iqembu.
Abayi ndawo nokho laba baqeqeshi njengoba sebevumbuke emaqenjini amabili aseNingizimu Afrika, agijima kwiBetway Premiership.
UKaze uzobe eqeqesha iSekhukhune United, kanti uBen Khalil uzocija iDurban City, enqobe iNedbank Cup ekupheleni kwesizini edlule.
Ngakolunye uhlangothi Amakhosi asathule du mayelana nokumemezela umqeqeshi omusha, yize esemataniswe nenqwaba yabaqeqeshi.
Kulabo baqeqeshi kubalwa uPitso Mosimane, uManqoba Mngqithi nabanye baphesheya kwezilwandle.
Njengamanje kusanakwe imidlalo yeNdebe yoMhlaba eqhubekayo e-USA, iseCanada naseMexico.
Nokho abalandeli beChiefs basalokhu belinde ukuzwa ukuthi yimuphi umqeqeshi ozohola iqembu ngesizini ezayo.
IChiefs isanda kumemezela ukuthi u-Aden McCarthy, odlala emuva, uyalishiya iqembu uya e-Azerbaijan kwiSabah FK.
Lo mdlali oneminyaka engu-22 ube nesizini enhle naMakhosi, edlala imidlalo engu-33 kuyona yonke imiqhudelwano.
Ushaye amagoli amabili wasiza iqembu ukuthi liqede endaweni yesithathu, lazibekisela indawo kwiCAF Confederation Cup.
“Singakuqinisekisa ukuthi sesivumile ukumdedela u-Aden ngemuva kokweshelwa yiSabah FK,” kusho uKaizer Motaung Jr, oyiSporting Director yeChiefs.
“Siyaziqhenya ngokuthi uzodlala imidlalo yokuhlunga ye-UEFA Champions League ngesizini ezayo.”
