URele Mofokeng usethubeni lokuhamba ezinyathelweni zikaPercy Tau

SIHLE NGUBO

Umdlali waseswini we-Orlando Pirates, uRelebohile Mofokeng, usethubeni lokuba umdlali wesibili waseNingizimu Afrika ukulandela ezinyathelweni zikaPercy Tau.

UMofokeng kusele kancane asayine kwiRoyale Union Saint-Gilloise yaseBelgium, okuyiqembu ake wagijima kulona uTau.

I-Lion of Judah izibonise e-Europe ngokushaya into ecokeme kwiSaint-Gilloise ngesizini ka-2018/2019.

UTau wafika kwezwakala eBelgium waze wakhethwa njengomdlali owashaya into ecokeme kunabo bonke ngaleyo sizini.

Washaya amagoli angu-13 waphinde wasiza ukwakha amanye angu-13.

Waphinde wafakwa eqenjini lesizini, wasiza iSaint-Gilloise ukuthi yenze kahle kwiBelgium Cup, ishaya iR.S.C. Anderlecht neK.R.C. Genk endleleni ebheke kowandulela owamanqamu.

UTau wayebolekiswe yiBrighton & Hove Albion F.C. yase-England kodwa wafika waba umdlali obalulekile kwiSaint-Gilloise.

Njengamanje okunye umdlali waseNingizimu Afrika unethuba lokuyibhala owakhe umlando eBelgium.

UMofokeng kuseduze ajoyine iSaint-Gilloise engompetha baseBelgium, njengoba leli qembu selivumelene ne-Orlando Pirates.

Kusele izinto ezimbalwa phakathi kwala maqembu, kanti umdlali uvele usevumile ukusayina inkontileka yeminyaka emine.

Uma konke kugcina kuhlangene uMofokeng uzoba umdlali wokuqala waseNingizimu Afrika ukudlalela iSaint-Gilloise, selokhu uTau afika eBelgium wenza izimanga.

Akungabazeki ukuthi ukuya kuleli qembu kuzomkhulula kakhulu uMofokeng.

Bese kukaningi lo mdlali emataniswa namaqembu aphesheya kodwa kugcine kungenzekanga lutho.

Kunalokho kuze kwahamba uMohau Nkota noMbekezeli Mbokazi, okungabadlali abafike kamuva eqenjini elikhulu (iPirates).