Ibe yimpumelelo enkulu kwi-Orlando Pirates le sizini

By SIhle Ngubo

I-Orlando Pirates iyona ezovala isizini ihleka yodwa ngokwemali eyitholile ikakhulukazi uma igcine iqukule indebe yeNedbank Cup ngempelasonto.

EZikamagebhula zivele seziqumbe amaphokethe njengoba zivule isizini ngokudla iMTN8 ngokushaya AmaZulu FC ngo 1-0 kowamanqamu nyakenye. 

Zibe sezikhala zemuka nesheke lika-R8 million. Isizini iqhubekile nokuba yinhle kubafana base-Orlando, bayibamba kahle kwiDStv Premiership baze bavala ngokuyiqeda endaweni yesibili kwilogi. 

Yize libe ngamaphuzu amaningi igebe phakathi kwabo neMamelodi Sundowns, ebe ngompetha beligi, kodwa bazohleka bodwa ngokuthola isheke lika-R7.5 million.

INedbank Cup abazodlala kuyona kowamanqamu neSekhukhune United, eLoftus Stadium, ePitoli, ngoMgqibelo, ibalinde ngesheke lika-R7 million uma beyiwina. 

Nokho wonke amaqembu adlala lo mqhudelwa athola u-R500 000 ngobuka yingxenye yawo nokuchaza ukuthi umanqoba uthola u-R7.5 million. 

Angu-32 amaqembu aba yingxenye yalo mqhudelwano kumbandakanya aweMotsepe Foundation Championship ayisishiyagalombili, nawe-ABC Motsepe League nawo ayisishiyagalombili.

I-Orlando Pirates ivele ino-R15.5 million ebhange ngokuwina iMTN8 nokulala isibili kwiDStv Premiership. Uma ingaqukula iNedbank Cup ngoMgqibelo kuzosho ukuthi izosonga isizini ino-R23 million.

Lokhu kuzobe kuchaza ukuthi izobe izuze kakhulu kunawo wonke amaqembu ngokwenkece lapha ekhaya.

Ngaphandle kwale mali iPirates isizibekisele indawo kwiCaf Champions League ngokuqeda isibili. 

Iyabonakala indima ekhathulwe yiBucs kule sizini esongwayo futhi kumele ukuthi wesese usihlalo wayo u-Irvin Khoza.

FUNDA NALA: Uxhoshwe izibani zeTheku umdlali ofike kuMaZulu ethwelwe ngeqoma

Kuzokhumbuleka ke ukuthi uKhoza wasolwa kakhulu ngesikhathi eqasha uJose Riveiro ngoba kuthiwa akakaze asebenze eqenjini elikhulu phambilini. 

Abanye baze bambiza ngoplamba lo mqeqeshi, bethi akukho okusile azofika nakho. Kodwa uma kubhekwa imiphumela, usebenzile lomfo waseSpain.